<h2>اے آرزوئے قتل ذرا دل کو تھامنا</h2> <h2>مشکل پڑا مرا مرے قاتل کو تھامنا </h2> <h2>تاثیر بیقراری ناکام آفریں</h2> <h2>ہے کام ان سے شوخ شمائل کو تھامنا </h2> <h2> دیکھے ہے چاندنی وہ زمیں پر نہ گر پڑے </h2> <h2>اے چرخ اپنے تو مہ کامل کو تھامنا </h2> <h2> مضطر ہوں کس کا طرز سخن سے سمجھ گیا </h2> <h2>اب ذکر کیا ہے سامع عاقل کو تھامنا </h2> <h2> ہو صرصر فغاں سے نہ کیونکر وہ مضطرب </h2> <h2>مشکل ہوا ہے پردۂ محمل کو تھامنا </h2> <h2> سیکھے ہیں مجھ سے نالۂ نے آسماں شکن </h2> <h2>صیاد اب قفس میں عنادل کو تھامنا </h2> <h2> یہ زلف خم بہ خم نہ ہو کیا تاب غیر ہے </h2> <h2> اے ہمدم آہ تلخی ہجراں سے دم نہیں </h2> <h2>گرتا ہے دیکھ جام ہلاہل کو تھامنا </h2> <h2> سیماب وار مر گئے ضبط قلق سے ہم </h2> <h2>کیا قہر ہے طبیعت مائل کو تھامنا </h2> <h2> آغوش گور ہو گئی آخر لہولہان </h2> <h2>آساں نہیں ہے آپ کے بسمل کو تھامنا </h2> <h2> سینہ پہ ہاتھ دھرتے ہی کچھ دم پہ بن گئی </h2> <h2>لو جان کا عذاب ہوا دل کو تھامنا </h2> <h2> باقی ہے شوق چاک گریباں ابھی مجھے </h2> <h2>بس اے رفوگر اپنی انامل کو تھامنا </h2> <h2> مت مانگیو امان بتوں سے کہ ہے حرام </h2> <h2>مومنؔ زبان بیہودہ سائل کو تھامنا</h2> <h3>مومن خان مومن </h3>