جس دن پروفیسر کو وارڈ میں رائونڈ کرنا ہو اس دن وارڈ میں بڑی رونق ہوتی ہے۔ مہتر (Sweeper) اور وارڈ سرونٹ سے لے کر رجسٹرار اور اسسٹنٹ پروفیسر تک سب لوگ پروفیسر کے آنے سے پہلے ہی وارڈ میں پہنچ کر صبح ہی سے اپنے کام میں جُت جاتے ہیں۔ اختر کی ڈیڑھ مہینے کے لیے آرتھوپیڈک وارڈ میں پوسٹنگ ہوگئی تھی۔ جس وقت وہ وارڈ میں پہنچا مہتری بڑی محنت سے فرش پر پوچھا مار رہا تھا۔ ایک پٹے والا دیواروں پر پان کی پیک سے بنائی گئی گلکاریوں کو مٹانے کی کوشش میں مصروف تھا، وارڈ سرونٹ ڈانٹ ڈانٹ کر مریضوں کے تیمارداروں کو وارڈ سے باہر نکال رہا تھا کہ بذاتِ خود ان لوگوں کے رش سے بھی تو وارڈ گندا لگنے لگتا ہے اور گندا ہو بھی جاتا ہے۔ اسٹاف نرس اپنی مخصوص ٹون میں ماسی پر برہم ہورہی تھی۔ PG اسٹوڈنٹ اپنے اپنے Bed پریذنٹ کرنے کی تیاری کررہے تھے جب کہ ہائوس آفیسرز مریضوں کی Morning Progress لینے میں مصروف تھے۔ اس کے لیے تو بہرحال یہ معمول کی بات تھی اس لیے قدرے بے نیازی سے ان مناظر کو دیکھتا وہ دفتر پہنچا تھا دیگر Consultants آچکے تھے اور پروفیسر صاحب کا انتظار تھا۔ اس نے محسوس کیا کہ رجسٹرار ایڈمنسٹریشن (Registrar Administration) خواہ مخواہ ہی ادھر ادھر کا چکر لگا رہے ہیں وہ کبھی ایک الماری کھول کر اس میں منہ دے کر کچھ تلاش کرنے لگتے کبھی دوسری میں کچھ الٹ پلٹ کرنے لگتے۔ کبھی باہر نکل جاتے اور کبھی آکر بیٹھ جاتے پھر کچھ یاد آتا اور وارڈ سرونٹ کو آوازیں دیتے ہوئے پھر باہر نکل جاتے۔ یہ بھی شاید رائونڈ والے دن کا معمول تھا۔ پروفیسر کے آنے کے بعد رائونڈ شروع ہوا اور ان کی سربراہی میں سولہ سترہ ڈاکٹروں کا گروپ ایک ایک کرکے مریضوں کو دیکھتا اور ڈسکس کرتا ہوا آگے بڑھنے لگا۔ بیڈنمبر 21 پر ایک ایسی لڑکی پڑی تھی جس کی دونوں ٹانگیں مڑی ہوئی تھیں۔ اس کا جسم کمزور، چہرہ بے رونق اور آنکھیں مردہ لگ رہی تھیں۔ وہ بستر پر پڑی بے بسی اور بے چارگی کی تصویر محسوس ہورہی تھی۔ ڈاکٹر ساجد کیس کے بارے میں پروفیسر کو بریف کرنے لگے۔ ’’سر اس کی دو سال کی ہسٹری ہے۔ اس کو چلنے پھرنے میں تکلیف ہوتی تھی جلد تھک جاتی تھی۔ پھر گھٹنوں میں شدید تکلیف ہوئی اور پھر گھٹنے کا جوڑ اس طرح سے مڑگیا کہ اب یہ چلنے پھرنے کے قابل نہیں رہی۔‘‘

وہ لڑکی اب اٹھ کر بیٹھ چکی تھی اور عجیب و غریب نگاہوں سے ڈاکٹروں کے ہجوم کو دیکھ رہی تھی جن کی توجہ کا مرکز اس وقت تو صرف وہی تھی اور جو اس کے متعلق اجنبی زبان میں گٹ پٹ کرتے ہوئے نجانے کیا باتیں کررہے تھے۔ ڈاکٹر ساجد بتا رہے تھے۔

’’سر! یہ لوگ غریب گھرانے سے تعلق رکھتے ہیں گھر میں عام طور پر سبزیاں استعمال ہوتی ہیں اور گوشت کم ہی کھایا جاتا ہے۔ گھر میں دھوپ بالکل نہیں آتی۔ اس کی دو بہنوں کو بھی اسی طرح کی بیماری ہے لیکن اتنی شدید نہیں۔‘‘

وہ کچھ رکے اور پھر فائل کو اٹھاکر کاغذات الٹتے ہوئے پھر گویا ہوئے ’’ہم نے اس کو Investigate کروایا ہے۔ اس کا کیلشیم لیول کم (Calcium Level Low) ہے جب کہ Alk Phosphatase بھی بڑھا ہوا ہے۔ سر! یہ Anaemic (خون کی کمی) بھی ہے اور اس کے X-ray Pathological Fractures ظاہر کررہے ہیں۔ انہوں نے X-ray Films سامنے کردیں۔ لیکن یہ اس کو Knee Joints (گھٹنوں) میں کیا Problem ہے۔ آپ بتائیں ڈاکٹر عامر، سَر نے اس کے مڑے ہوئے گھٹنوں کی طرف اشارہ کیا اور اچانک ہی عامر سے سوال کردیا۔

’’سر! غالباً یہ Contractures بن چکے ہیں کیوں کہ اس کو گھٹنوں کو موڑے رکھنے میں زیادہ آرام محسوس ہوتا تھا اس لیے ایک طویل عرصے تک اس نے اپنی ٹانگوں کو اسی طرح رکھا خاص طور پر Fracture (ہڈی کا ٹوٹنا) کے بعد بھی ٹانگیں اسی طرح رہیں۔‘‘ کچھ گڑبڑاکر عامر نے تیزی سے جواب دیا اور پھر تائید طلب نگاہوں سے سَر کی طرف دیکھنے لگا۔ اور سَر عامر کی بات کی تائید کرنے کے بجائے اس لڑکی سے پوچھنے لگے، ’’بے بی! آپ کو کیا ہوا تھا شروع میں۔‘‘ سَر کی آواز نرم اور لہجہ ہمدرد تھا۔ گھبرائی ہوئی لڑکی نے ایک نظر سر کو دیکھا اور پھر اپنے گھٹنوں پر ہاتھ رکھ کر کہنے لگی، ’’ڈاکٹر صاحب مجھے یہاں درد ہوا تھا… اور …اور۔‘‘ وہ اٹک گئی۔

’’اور…‘‘ اس کی آواز حلق میں پھنس کر رہ گئی اور پھر وہ بے آواز ہوکر رونے لگی۔

’’رو نہیں بے بی۔ روتی کیوں ہو؟‘‘ سرنے اس کے منہ پر ہاتھ رکھا۔ ’’اگر رونے سے مسئلہ حل ہوجائے گا تو خوب رولو۔ لیکن رونے سے آپ کا مسئلہ حل ہوگا نہیں۔‘‘

وہ اپنے آنسو پونچھنے لگی۔

’’ساجد صاحب آپ نیورولوجی والوں سے بھی Opinion (رائے) لے لیں۔ اس کو Skin Traction لگوائیں اور کیلشیم اور وٹامن ڈی تھراپی شروع کروادیں۔‘‘ سر نے کہا اور آگے بڑھ گئے۔ لیکن اختر یہ محسوس کرنے لگا کہ شاید وہ اس لڑکی کی حالت دیکھ کر دل گرفتہ ہوگیا ہے۔ سب اس بیڈ سے ہٹ کر دوسرے بیڈ تک پہنچ چکے تھے اس نے اپنے ذہن کو جھٹکا اور سب کے پیچھے چل دیا۔ وہاں شاید اب Diabetic Foot ڈسکس ہورہا تھا لیکن وہ ایک لفظ بھی نہیں سن سکا۔ نجانے کیوں اس پر سوچوں کی یلغار ہوچکی تھی۔ وہ سوچنے لگا کہ اس لڑکی کا مستقبل کیا ہوگا؟ کیا یہ بالکل ٹھیک ہوجائے گی؟ اور اگر اس کی ٹانگوں میں تھوڑا سا بھی Defect (نقص) رہ گیا تو کیا معاشرہ اسے قبول کرلے گا؟ پھر اسے خیال آیا کہ وہ کچھ زیادہ حساس ہورہا ہے ہمارے ہاں تو ایسے بے شمار Cases ہوتے رہتے ہیں اگر وہ ہر کسی کے بارے میں اتنا حساس ہوکر سوچنے لگا تو پھر گزر چکی زندگی۔ وہ اچانک بہت زیادہ تھکن محسوس کرنے لگا۔ ’’یہ رائونڈ ختم ہو تو چائے پینے چلیں گے۔‘‘ اس نے عامر کے کان میں سرگوشی کی۔ اور عامر نے گردن ہلادی ۔ لیکن رائونڈ بھی طویل تر ہوتا جارہا تھا۔ خداخدا کرکے رائونڈ ختم ہوا تو وہ عامر کے ساتھ کینٹین کی طرف چل دیا۔ چائے پینے کے دوران وہ خواہ مخواہ بہت زیادہ بولنے لگا اور نجانے کون کون سے ٹاپک ڈسکس کرنے لگا۔ کبھی ایسا ہوتا ہے کہ آپ اپنے اندر کے شور سے پیچھا چھڑانے کے لیے یا ضمیر کی آواز پر کان نہ دھرنے کے لیے اپنے آپ کو کسی اور چیز میں مصروف کرنے کی کوشش کرتے ہیں لیکن وہ جس موضوع سے بچنے کی کوشش کررہا تھا۔ عامر اس وہیں لے آیا۔ عامر بھی اس لڑکی کے آنسوئوں سے بڑا متاثر ہوا تھا۔ لیکن اس کے خیال میں ہم کیا کرسکتے ہیں۔ ’’ہاں واقعی ہم کیا کرسکتے ہیں۔‘‘ اس نے بھی گردن ہلادی۔ وہ وارڈ میں واپس آیا تو وہاں یہ مردۂ روح فرما سننے کو ملا کہ آج اسے 24  گھنٹے آن ڈیوٹی رہنا ہے کیوں کہ ندیم چھٹی پر ہے اور قرعہ فال اس کے نام نکلا ہے۔ اس کا برا سا منہ دیکھ کر عامر کہنے لگا، ’’تو کیا ہوا Non Emergency Dayہے۔ مریض تو آئیں گے نہیں۔ تم فون کا پلگ نکال کر اور کتاب کھول کر بیٹھ جانا۔ پڑھائی تو یہاں بھی ہوسکتی ہے؟ تو تم کیوں نہیں دے لیتے ڈیوٹی۔ اگر ایسی آسان ہے۔‘‘ اس نے عامر پر جوابی کارروائی کی تو عامر بغلیں جھانکنے لگا۔ پھر آہستہ آہستہ وارڈ میں ڈاکٹروں کا رش کم ہونے لگا اور اسی حساب سے مریضوں کے تیمارداروں کا رش بڑھنے لگا۔ ظہر کے بعد تو صرف وہی اکیلا ڈاکٹر ڈیوٹی روم میں بیٹھا آج کا بور دن بہتر طریقے سے گزارنے کے منصوبے بنا رہا تھا۔ نرسیں کھانا کھانے جاچکی تھیں۔ وارڈ سرونٹ دوسرے وارڈ کے سرونٹ کے ساتھ بیٹھا گپیں مار رہا تھا۔ Sweeper بنچ پر بیٹھا اونگھ رہا تھا اور ماسی نجانے کہاں غائب ہوچکی تھی۔ اس نے کتاب کھولی اور ورقہ گردانی کرتے ہوئے سوچنے لگا کہ آج کیا کیا پڑھا جائے۔ جیسے جیسے شام کے سائے لمبے ہورہے تھے وارڈ میں خاموشی بڑھتی جارہی تھی۔ وہ بہت کوشش کے بعد کتاب میں غرق ہوہی چکا تھا۔ اور صرف دوبار ہی سطح پر عصر اور مغرب کی نماز ادا کرنے کے لیے نظر آیا۔ پڑھتے پڑھتے اس نے گھڑی پر نظر ڈالی خاصا وقت ہوچکا تھا اس نے سوچا کہ Night round کے ذریعے مریضوں کی بھی کچھ خیر خبر لے لی جائے۔ وہ اٹھنے ہی والاتھا کہ دروازے پر ایک سوکھی ہوئی کانٹا سی ادھیڑ عمر عورت جس کے دانت وقت سے پہلے ہی نجانے کیوں جھڑچکے تھے نمودار ہوئی۔ اسے دیکھ کر وہ سوچنے لگا کہ ہو نہ ہو۔ عورت تپ دق کی مریضہ ہے۔ ’’ڈاکٹر صاحب! زاہدہ کو کھانے میں پرہیز کیا کرنا ہے۔‘‘ وہ بولی۔

زاہدہ! بیڈ نمبر کون سا ہے؟ فوری طور پر اس کے ذہن میں مریض کا چہرہ نہیں آسکا۔ ’’وہ 21  نمبر ہے ناجی صبح آپ… اس سے پہلے کہ وہ بات مکمل کرتی وہ بولا۔

’’اوہ اچھا… وہ جس کی ٹانگوں میں Problem ہے۔‘‘ اس نے سمجھ جانے والے انداز میں گردن ہلائی اور صبح کا Round اس کی آنکھوں میں گھوم گیا۔ ’’اماں کھانے میں اس کو کچھ پرہیز نہیں کرنا سب کھلانا ہے اور خاص طور پر دودھ، انڈا، مچھلی اور تازہ پھل یہ چیزیں ضرور دینی ہیں۔‘‘

اس نے سمجھانے والے انداز میں کہا، ’’خوراک کا ہی تو مسئلہ ہے سارا اس بچی کا… شاید تمہاری بیٹی ہے وہ… اس کو اچھی خوراک چاہیے۔‘‘ لیکن پھر وہ سوچنے لگا کہ کیا یہ سوکھی ہوئی عورت اس بچی کی خوراک کا مسئلہ حل کرسکے گی؟ ’’کیا کرتا ہے تمہارا شوہر؟‘‘ اس نے سوچتے ہوئے سوال کیا۔

’’پانچ سال ادھر اس کا تو انتقال ہوگیا۔‘‘ اس نے کانٹا سی عورت کا چہرہ دیکھا وہاں تاثرات میں کچھ بہت زیادہ تبدیلی واقع نہیں ہوئی تھی۔ شاید وہ یہ جواب دینے کی عادی ہوچکی تھی۔ کیا اسے افسوس کا اظہار کرنا چاہیے۔ چند لمحے سوچتے رہنے کے بعد اس نے فیصلہ کیا کہ اس عورت کی مکمل کہانی سننی چاہیے۔

انوری بیگم کی جس وقت شادی ہوئی اس زمانے میں ٹی وی اتنا نہیں عام ہوا تھا اور نہ ان کی عمر اتنی تھی کہ انہوں نے زمانے کو کچھ دیکھا ہوتا اس لیے نہ ان کے خوابوں کی اڑان اتنی اونچی تھی اور نہ ہی ان کو معلوم تھا کہ ریشمی کپڑا کتنا نرم ہوتا ہے اور اس کی بہار کیسی ہوتی ہے۔ یا یہ کہ زیورات کی کتنی قسمیں اور کتنے ڈیزائن ہوتے ہیں اور قیمتی پتھر کیا ہوتے ہیں۔ یا یہ کہ میرے میں کتنی چمک ہوتی ہے اور اس کو پہنے والے کتنی بڑی جائیداد کے مالک ہوتے ہیں۔ انہوں نے تو بس اپنا آدھا کچا اور آدھا پکا گھر، اس سے باہر گلی اور گلی سے باہر محلہ اور سڑک پر ملا کی دکان بس یہی کچھ دیکھا تھا۔ انہوں نے اپنے ماں باپ اور دادی کے ہمراہ 14 برس ایک نارمل زندگی گزاری تھی جس میں غربت کے معمولی مسائل ضرور تھے لیکن عزتِ نفس کو مجروح کرنے والاکوئی نہیں تھا، احساسِ محرومی سے لوگوں کے دل و دماغ چھلنی نہیں تھے، حرص وطمع کی بیماری نے اسی طرح وبا کی صورت اختیار نہیں کی تھی اور نہ ہی طبقاتی امتیاز اتنی ہولناک شکل میں سامنے آچکا تھا۔ اس وقت غریب کے لیے عزت کی روزی کے دروازے اس طرح مسلسل تیزی سے بند نہیں ہوتے جارہے تھے بلکہ محنت کا صلہ جلد یا بدیر مل ہی جاتا تھا۔ انہوں نے اپنی شادی کو ایک خوشگوار واقعے کی حیثیت دیتے ہوئے اپنے شوہر کے کچے پکے مکان کو دل سے قبول کیا اور اسے ایک پرسکون گھر بنانے کی حتی الامکان کوشش کرنے لگیں۔ ان کے شوہر ایک مقامی فیکٹری میں Store Keeper تھے۔ وقت گزرنے کے ساتھ ساتھ گھر کے افراد میں بھی اضافہ ہوتا گیا اور اسی لحاظ سے وسائل اور مسائل کی آپس میں مسابقت کی رفتار میں بھی تیزی آگئی۔ ان کے شوہر نوکری کے ساتھ ساتھ رات کو ٹافیوں اور بسکٹ کا ٹھیلا بھی لگانے لگے۔ پھر جس طرح بچے تیزی سے بڑے ہونے لگے اسی طرح حالات بھی تیزی سے بدلنے لگے۔ ان کے گھر کے آس پاس کے کچھ مکان پہلے پکے ہوئے، پھر دو منزلہ اور سہ منزلہ اور پھر ان میں اینٹینا اور ڈیش اینٹینا دھرے ہوئے نظر آنے لگے۔ وہ حیران تھیں کہ جن کچھ گھروں میں پیسہ آرہا ہے تو بس آئے چلے جارہا ہے اور کچھ گھروں میں اگر غربت ہے تو جیسے اس نے راستہ دیکھ لیا ہے۔ یہ سب مقدروں کے کھیل ہیں۔‘‘ کچھ اور لوگ ٹکڑا لگاتے۔ ’’اور یہ اوپر والے کی برکت نہیں اوپر کی آمدنی کی برکت ہے۔

گھر میں آئے گئے لوگ جب اس طرح کی باتیں کرتے تو ان کے بچے پوچھتے، ’’امی یہ اوپر کی آمدنی کیا ہوتی ہے۔‘‘ اور ان کی سمجھ میں نہیں آتا کہ وہ کیا بتائیں۔

پھر حکومت تبدیل ہوئی، کچھ مکان مزید پکے اور اونچے ہوئے اور کچھ مزید کچے، بچے کچھ اور بڑے ہوگئے۔ آس پاس نظر آنے والے رنگ و بو کے سیلاب کو طرح طرح کی اشیا سے لدی پھندی دکانوں اور بھانت بھانت کے لوگوں اور ان کی باتوں کو دیکھتے اور سنتے اور پھر اپنی ماں سے قسم قسم کے سوالات کرتے۔ جب انوری بیگم تنگ آجائیں تو ڈانٹے مارنے پر اتر آئیں۔

ان کے شوہر بھی کچھ دنوں سے پریشان تھے کہ حکومت کی پالیسی نجانے کیسی تھی فیکٹریاں اور ملیں یکے بعد دیگرے بند ہوتی چلی جارہی تھیں اور لوگ بے روزگار ہورہے تھے۔ وہ کسی ناگہانی آفت سے پہلے کسی دوسری نوکری کی تلاش میں تھے لیکن اس سے پہلے کہ کوئی دوسری نوکری ملتی فیکٹری بند ہوگئی اور وہ بھی بہت سے دوسرے لوگوں کی طرح بے روزگار۔ اب ٹھیلہ سارے دن لگنے لگا۔ لیکن ٹھیلے کی آمدنی سے بھرے پر لے گھر کا خرچہ کیونکر چلتا ان کے ماشاء اللہ 6 بچے تھے۔ چار لڑکیاں اور دو لڑکے جو سب سے چھوٹے تھے۔ پھر غربت اور فاقوں نے زندگی کو اس بے رحم طریقے سے تلپٹ کیا کہ پہلے لڑکیوں کو اسکول سے اٹھانا پڑا اور پھر انوری بیگم کو گھبراکر گھر سے نکلنا پڑا۔ انہوں نے قریب کی ایک امیر بستی میں کسی بنگلے پر بطور نوکرانی کام تلاش کرلیا تھا۔

حکومت بدلی اور حالات تبدیل ہوئے۔ بچیوں کے قد بڑے ہوئے اور شوہر کی صحت گرتی چلی گئی وہ دن بھر ٹھیلہ چلاتے اور رات بھر کھانستے رہتے۔ ایک رات کھانستے کھانستے اچانک وہ خاموش ہوگئے۔ انوری بیگم کی آنکھ کچھ پہلے ہی لگی تھی۔ صبح وہ ان کو بیدار کرنے پہنچیں تو وہ ٹھنڈے ہوچکے تھے۔ انوری بیگم تو گویا تپتے ہوئے صحرا کی دھوپ میں اچانک گھنی چھائوں سے محروم ہوگئیں۔ ان کی سمجھ میں ہی نہیں آرہا تھا کہ یہ کیا ہوگیا ہے اور جب سمجھ میں آیا تو ان کی چیخوں سے در و دیوار ہل گئے۔ وقت سے سے بڑا مرہم ہے سنی سنائی بات اب سچ ہوتی نظر آرہی تھی۔ وہ سوچ بھی نہیں سکتی تھیں کہ شوہر کے بغیر وہ جی سکتی ہیں لیکن اب وہ جی رہی تھیں اور سوچ رہی تھیں کہ انہیں جینا پڑے گا۔ اب وہ ایک سے زائد بنگلوں میں جھاڑو برتن اور دیگر کام کاج کرنے لگیں۔ چھوٹا لڑکا گیراج  میں موٹر مکینک کا کام سیکھنے جانے لگا اور لڑکیاں گھر پر پرانے اخباروں کے لفافے بنانے لگیں۔

حکومت بدلی اور ان کے تمام بچے بڑے ہوگئے نا آسودگیوں اور محرومیوں کی داستان لیے سوکھے، فاقہ زدہ جسم اور بے رونق چہروں کے ساتھ۔ ان کے بڑے بیٹے نے آوارہ لڑکوں کی صحبت میں پڑ کر سگریٹ کی لت پال لی تھی اور نجانے کہاں سے اس میں انتہا درجے کی سر کشی آگئی تھی۔ وہ کسی کو خاطر میں نہ لاتا اور ہر وقت کسی نہ کسی سے لڑتا رہتا۔ وہ ڈھنگ سے کوئی کام نہ کرتا اور جس جگہ کام پر لگتا تھوڑے دنوں بعد نکال دیا جاتا۔ پھر ان پر انکشاف ہوا کہ وہ ہیروئن پینے لگا ہے۔

’’ارے کمبخت اپنی بہنوں کا ہی خیال کر لے۔ بے غیرت۔‘‘ وہ چیختیں۔

’’جواب میں وہ خاموشی سے سگریٹ کا دھواں اڑتا رہتا جس پر وہ مزید آگ بگولہ ہوجاتیں۔

’’میں کہتی ہوں تو اس سرکٹ کو چھوڑ کیوں نہیں دیتا۔ کوئی کام کیوں نہیں کرتا کچھ کماتا کیوں نہیں؟‘‘ اور پھر وہ اس کی سگریٹ چھیننے کے لیے آگے بڑھتیں۔ ’’چھوڑ دے اس کو کمبخت۔ چھوڑ دے۔‘‘ لیکن وہ اپنی سگریٹ کو بچاتا ہوا کھڑا ہوجاتا۔

’’یہ نہ چھین اماں مجھ سے۔ یہ میرا سکون ہے۔ یہ میری جنت ہے۔ یہ نہ چھین مجھ سے۔‘‘

’’ارے یہ زہر ہے تو سمجھتا کیوں نہیں۔ یہ آگ ہے نگل لے گی تجھ کو بھی اور اس گھر کو بھی۔‘‘ اور پھر وہ رونے لگتیں لیکن وہ ہر چیز سے بے نیاز ہو کہ بڑبڑاتا ہوا گھر سے نکل جاتا۔

پھر کبھی وہ دھیمے ہوکر اس کو پیار سے سمجھانے کی کوشش کرلیتیں۔

’’دیکھ تو کوئی چھوٹا موٹا کام ڈھنگ سے کرے گا تو یہ گھر بنے گا۔ تیری بہنوں کی شادیاں ہوں گی۔‘‘

’’چھوٹا موٹا کام!‘‘ وہ کہتا اور عجیب انداز سے ہنسنے لگتا۔ ’’چھوٹے موٹے کام سے کچھ نہیں ہوتا اماں۔ اس گھر کو بنانے کے لیے ’بڑے کام‘ کی ضرورت ہے۔ بڑے کام کی بلکہ بڑا ہاتھ مارنے کی میں کسی دن بڑا ہاتھ ماروں گا۔‘‘ پھر وہ کسی غیر مرئی شے کو خلا میں گھورنے لگتا۔ وہ اس کی باتوں کو اول فول قرار دیتی ہوئی تھک کر اٹھ جاتیں۔ پھر یوں ہوا کہ اس نے گھر آنا کم کردیا کئی کئی دن گھر نہ آتا اور جب آتا اس کی حالت پہلے سے زیادہ خراب ہوتی۔ وہ چیخ سکتی تھیں، رو سکتی تھیں لیکن اس کے پیچھے کہاں تک بھاگتیں کہاں تک اس کی نگرانی کرتیں بالآخر اس کو بھی اپنے نصیب کا لکھا جان کر صبر کے گھونٹ پی کر رہ گئیں۔

حکومت بدلی اور وہ سوکھ کر بنجر رہ گئیں۔ رات کو تھکی ہاری باسی کھانے لیے جب وہ گھر لوٹتیں تو تپتے ہوئے جسم کے ساتھ بستر پر پڑی کھانستی اور کراہتی رہتیں۔ جب ان کی کھانسی بڑھی تو وہ خوفزدہ ہوگئیں کہ اگر وہ بھی مرگئیں تو ان کی بچیوں کا کیا ہوگا۔ کہہ سن کر سرکاری ہسپتال پہنچیں تو تپ دق تشخیص کرکے انہیں 9 مہینے کی دوائیاں اور بہتر خوراک کا مشورہ دے دیا گیا۔ بہتر خوراک تو کیا ملتی۔ دوا کھا کر گھر پر پڑ رہیں۔ بڑی بیٹی نے ضد کرکے کچھ دن ان کو گھر پر روک لیا اور اپنے سے چھوٹی بہن کو کام پر بھیج دیا۔ زاہدہ جب بنگلے میں کام پر پہنچی تو اس دن اتفاق سے وہاں کسی تقریب کا اہتمام ہورہا تھا۔ گھر مہمانوں سے بھرا ہوا تھا۔ کچھ تو تقریب کے انتظامات کے سلسلے میں لوگوں کی بھاگ دوڑ اور بہت کچھ Enjoyment کے نام پر نوجوانوں کی دھما چوکڑی کی وجہ سے ایک افراتفری کا عالم تھا۔ اس اجنبی ماحول میں ڈری سہمی ہوئی زاہدہ نے جب پہنچ کر مالکن سے اپنا تعارف کروایا تو وہ غصے سے آگ بگولہ ہوگئیں۔

’’کہاں مرگئی تمہاری اماں۔ دو دن سے غائب ہے گھر میں اتنا کام پڑا ہے اسے پتا بھی تھا کہ ارم کی منگنی ہے گھر میں کام ہوگا۔ عین وقت پر غائب ہوگئی۔‘‘ مارے غضب کے ان کا سانس پھولنے لگا۔

’’وہ جی امی کی طبیعت خراب تھی کل ہم انہیں ہسپتال بھی لے گئے تھے۔‘‘ وہ جیسے کسی درخت کی کھوہ میں بیٹھی بول رہی تھی۔

’’سب کام سے بھاگنے کے بہانے ہیں ارے کام نہیں ہوتا تو گھر میں بیٹھو یا کوئی اور جگہ دیکھو ہمیں کیوں مشکل میں ڈالتی ہو۔‘‘ وہ کچھ رکیں ’’میں نے بھی کچی گولیاں نہیں کھیلیں دو دن کی تنخواہ کاٹوں گی۔‘‘ پھر ان کا روئے سخن اپنی نند کی طرف ہوگیا۔ بولیں، ’’لو بھلا بتائو۔ آئے دن چھٹیاں کریں گی کبھی پڑوس میں میت ہوگئی، کبھی بیٹی بیمار ہوگئی، کبھی کسی کے ہاں بچہ ہوگیا۔ میں نے کیا مفت میں تنخواہ دینے کے لیے رکھا ہوا ہے۔‘‘ وہ پھر زاہدہ کی طرف متوجہ ہوکر اسے ایسے گھورنے لگیں جیسے کھا ہی تو جائیں گی اور زاہدہ اس وقت شرم اور ذلت کے احساس سے زمین میں گڑی جاہی تھی۔ ’’اب دفعان ہو کچن میں۔ ڈھیروں کام پڑا ہے۔ آج تمہیں رات تک یہاں رکنا پڑے گا۔‘‘ وہ دھاڑیں اور ساتھ ہی اوور ٹائم لگانے کا حکم بھی صادر فرما دیا۔

زاہدہ اپنے آنسو پیتی ہوئی کچن میں چل دی۔ ایک تو بالکل اجنبی ماحول اور اجنبی لوگ پھر اس پر سے بالکل نیا کام جس کا اسے تجربہ نہ تھا اس پر مستزاد مالکن کا رویہ۔ وہ تو اس قدر دل گرفتہ تھی کہ بس نہیں چل رہا تھا گھر بھاگ جائے اور کمر بند کرکے دھاڑیں مارمار کر روئے۔

تقریب کے انتظامات، کھانے کے لوازمات اور خواتین کے ملبوسات و زیورات دیکھ کر تو اس کی آنکھیں پھٹی کی پھٹی رہ گئیں وہ حیرت و حسرت سے ایک ایک لڑکی کی ڈریسنگ اور جیولری تکا کرتی اور سوچتی کہ کیا کوئی ایسا دن اس کی زندگی میں آسکتا ہے جب یہ سب کچھ اسے بھی میسر ہو؟ لیکن اپنے چشمِ تصور سے بھی اسے اپنے مستقبل کے نقشے میں کچا پکا مکان، تنگ و تاریک ابلتی نالیوں والی گالیاں، لنڈے کے کپڑے اور ہر مال دو روپیہ سے خریدے گئے گھٹیا ہار بندے ہی نظر آتے۔ وہ مایوس ہوجاتی اور اپنا ذہن جھٹک کر کام میں دل لگانے لگتی۔

رات تھکی ہاری تقریب کا بچا کھچا ہوا کھانا لے کر جب وہ گھر پہنچی تو چھوٹے بہن بھائی کھانے پر جیسے ٹوٹ ہی تو پڑے کہ ان کے لیے تو یہ اعلیٰ ترین کھانا تھا۔ وہ سارے دن کی بھوکی ہونے کے باوجود ایک لقمہ بھی نہ توڑ سکی اور چپ چاپ جاکر اپنے بستر پر لیٹ گئی۔ وہ جو کچھ دیکھ کر آئی تھی اس سب کے بعد اسے اپنے بہن بھائیوں کی یہ مسرت بہت حقیر لگی۔ شاید اس کے خوابوں کی اڑان اب بلند ہوگئی تھی۔ یا شاید وہ بنگلے والوں کے رویے سے دل گرفتہ تھی یا شاید کام کی زیادتی سے وہ تھک گئی تھی اسے خود بھی صحیح طرح اپنے دل کی حالت سمجھ میں نہیں آرہی تھی۔ بڑی بہن شاہدہ نے کاص طور پر اس کی بدلی ہوئی کیفیت نوٹ کی وہ آکر اس کے سرہانے بیٹھ گئی اور سر پر ہاتھ رکھ کر بولی۔

’’کیا ہوا زاہدہ۔ کھانا کیوں نہیں کھاتیں کیا کھا کر آئی ہو۔‘‘

’’ہاں…‘‘ اس نے جواب دیا اور سوچنے لگی کہ ڈانٹ اور پھٹکار کھاکھا کر میرا پیٹ تو بھر ہی گیا ہے۔

’’کیا بہت تھک گئی ہو؟‘‘ اس نے سوال کیا پھر خود ہی جو اباً بولی، ’’خیر یہ سوال تو فضول ہے کام تو واقعی وہاں بہت ہوگا آج منگنی جو تھی کل تم سائرہ (چھوٹی بہن) کو ساتھ لے جانا امی تو ابھی کچھ دن اور نہیں جاسکیں گی۔‘‘ وہ بالکل چپ چاپ لیٹی چھت کو تکتی رہی۔

’’کیا بات ہے زاہدہ تم بہت چپ چپ ہو؟‘‘ شاہدہ کو اس کی خاموشی سے وحشت ہونے لگی۔

’’کوئی بات نہیں ہے آپا… کوئی بات نہیں ہے۔‘‘ اس نے کہا اور پھر رو پڑی۔ شاہدہ نے اسے لپٹا لیا اور اس کے رونے کی وجہ اصرار کے ساتھ پوچھنے لگی لیکن وہ اسے کچھ بھی تو نہیں بتا سکی۔ دور لیٹی ہوئی انوری بیگم بہت کچھ جانتے ہوئے انجان بننے کی کوشش کرتے ہوئے سوتی بن گئیں۔ وہ جانتی تھیں کہ زاہدہ کے رونے کی وجہ کیا ہے پھر وہ اس سے کیا پوچھتیں۔ اگر وہ کچھ پوچھتیں بھی تو جواباً زاہدہ کے پاس ایسے سوال ہوتے جن کا جواب انوری بیگم کے پاس نہیں تھا۔

ایک اور حکومت بدلی۔ انوری بیگم کے بڑے بیٹے کی ہیروئن کی لت چھوٹ نہیں سکی۔ چھوٹے بیٹے نے پڑھائی یکسر ترک کرکے موٹر مکینک کے ہاں کل وقتی نوکری کرلی اور ایک دن ’چھوٹے‘ سے بڑے ہوکر ’استاد‘ بننے کے خواب دیکھنے لگا کہ جب اس کے پاس اپنی ورکشاپ ہوگی اور اس کے پاس بھی کچھ ’چھوٹے‘ ملازم ہوں گے۔ چاروں بہنیں گھر میں لفافے بناتیں اور فروخت کرتیں، گھروں پر کام کاج کرتیں اور ڈانٹ پھٹکار کھاتیں، اچھے دنوں کی آمد کا انتظار کرتیں اور خوابوں کی اونچی نیچی اڑان اڑتیں زندگی کے دن گزارتی رہیں۔ لیکن زاہدہ نجانے کیوں بہت چپ چپ ہوگئی تھی۔ گھر میں پکنے والامعمولی کھانا یا بنگلوں سے آیا ہوا باسی اور ’اعلیٰ‘ کھانا اسے کچھ اچھا نہیں لگتا تھا۔ وہ چند لقمے زہر مارکرتی اور بستر پر پڑی رہتی۔ ایک روز اسے بڑا شدید بخار چڑھا۔ کچھ روز بعد بخار تو اتر گیا لیکن کمزوری میں بہت زیادہ اضافہ ہوگیا۔ اس کی ٹانگوں میں شدید درد رہنے لگا وہ زیادہ چل نہ پاتی اور جلد تھک جاتی۔ بنگلوں پہ جاکر کام کرنا اس نے ترک کردیا اور گھر پر بیٹھی بیٹھی لفافے بنانے لگی۔ وہ ٹانگیں موڑے ہوئے بیٹھتی تھی۔ کھڑے ہونے میں اسے خاصی تکلیف ہوتی تھی اور گھٹنے درد کرنے لگتے تھے۔ رفتہ رفتہ اس کی ٹانگیں مڑسی گئیں اور وہ بالکل معزور ہوکر بیٹھی کی بیٹھی رہ گئی۔

انوری بیگم کی آنکھوں میں آنسو آگئے تھے وہ دوپٹے کے پلو سے اپنے آنسو صاف کرتی ہوئی اٹھیں اور اپنی زاہدہ کے بہتر علاج کی درخواست کرتی ہوئی باہر چلی گئیں۔ اختر کرسی پر جما کا جما رہ گیا تھاوہ خواہش کے باوجود انوری بیگم کو تسلی دلاسے کا ایک لفظ بھی نہیں کہہ سکا۔

دوسرے دن کال بھیج کر Neurology والوں کو بلوایا گیا انہوں نے معائنہ کیا اور آستیوملیشیا (Osteomalacia) تشخیص کرکے علاج پر اطمینان کا اظہار کیا۔ اختر ڈیوٹی آف کرکے گھر پہنچا تو بھی اسے ہر وقت انوری بیگم اور زاہدہ کا خیال ستاتا رہا۔ اس نے سوچا کہ ان کی کچھ نہ کچھ مدد ضرور کرنی چاہیے۔ دوسرے دن بھی اس کی Night duty تھی وہ ہسپتال پہنچا اور Male ward کا رائونڈ کرکے ڈیوٹی روم میں جا بیٹھا۔ آج بھی وارڈ کانان ایمرجنسی ڈے تھا۔ اس نے فون کا پلگ نکالا اور کتاب کھول کر ورق گردانی کرنے لگا۔ وہ سوچ رہا تھا کہ ’یہ تو بہت مشکل ہے کہ زاہدہ بالکل ٹھیک ہوجائے اور اگر یہ تھوڑی سی بھی Defective رہی تو اس کا کیا ہوگا؟‘‘ اس نے کتاب کا ایک اور ورق الٹا ’’اگر زاہدہ اس حال کو پہنچی تو اس میں کس کا کتنا قصور ہے۔ ہمارے معاشرے کا کتنا اور ہماری حکومت کا کتنا؟‘‘ طرح طرح کے سوالیہ نشان اسے کتاب میں ناچتے ہوئے نظر آنے لگے۔ اس نے کتاب بند کی اور Female ward کے رائونڈ کے لیے چل دیا۔ بہت سے مریض سو رہے تھے اور ان کے تیماردار بھی بستر کے ساتھ ہی زمین پر دریاں بچھائے یا تو سو رہے تھے یا بینچ پر بیٹھے اونگھ رہے تھے۔ بیڈنمبر 20 پر پڑے ایک بچے کی دادای البتہ پاندان سامنے رکھے ایک پان کھا رہی تھیں اور دوسرے پان کے لیے چھالیہ کتر رہی تھیں۔ اس نے دیکھا انوری بیگم بینچ پر بیٹھی مسلسل ایک طرف دیکھ رہی ہیں۔ ان کی آنکھوں میں اپنے کرب ناک ماضی اور مستقبل کی فکر سے متعلق ان ان گنت سوال تھے۔ ان کی نگاہوں کے تعاقب میں اختر کی نگاہ بستر پر پڑی ہوئی زاہدہ پر پڑی۔ وہ سورہی تھی۔ پژمردہ اور سوکھی ہوئی زاہدہ۔ سوتے ہوئے اس کا جسم خم کھا گیا تھا۔ جسم کے ساتھ جڑی مڑی ہوئی ٹانگوں نے اس کو ایک ’’سوالیہ نشان‘‘ کی صورت دے دی تھی۔