<h2>دل ہی تو ہے نہ سنگ و خشت درد سے بھر نہ آئے کیوں </h2> <h2>روئیں گے ہم ہزار بار کوئی ہمیں ستائے کیوں</h2> <h2> دیر نہیں حرم نہیں در نہیں آستاں نہیں</h2> <h2> بیٹھے ہیں رہ گزر پہ ہم غیر ہمیں اٹھائے کیوں</h2> <h2> جب وہ جمال دلفروز صورت مہر نیمروز</h2> <h2> آپ ہی ہو نظارہ سوز پردے میں منہ چھپائے کیوں</h2> <h2> دشنۂ غمزہ جاں ستاں ناوک ناز بے پناہ</h2> <h2> تیرا ہی عکس رخ سہی سامنے تیرے آئے کیوں</h2> <h2> قید حیات و بند غم اصل میں دونوں ایک ہیں</h2> <h2> موت سے پہلے آدمی غم سے نجات پائے کیوں</h2> <h2>حسن اور اس پہ حسن ظن رہ گئی بوالہوس کی شرم</h2> <h2> اپنے پہ اعتماد ہے غیر کو آزمائے کیوں</h2> <h2> واں وہ غرور عز و ناز یاں یہ حجاب پاس وضع</h2> <h2> راہ میں ہم ملیں کہاں بزم میں وہ بلائے کیوں</h2> <h2> ہاں وہ نہیں خدا پرست جاؤ وہ بے وفا سہی</h2> <h2> جس کو ہو دین و دل عزیز اس کی گلی میں جائے کیوں</h2> <h2> غالبؔ خستہ کے بغیر کون سے کام بند ہیں</h2> <h2> روئیے زار زار کیا کیجیے ہائے ہائے کیوں</h2> <h3>مرزا غالب</h3>
