<h2>جو اس شور سے میرؔ روتا رہے گا</h2> <h2>تو ہمسایہ کاہے کو سوتا رہے گا</h2> <h2>میں وہ رونے والا جہاں سے چلا ہوں</h2> <h2>جسے ابر ہر سال روتا رہے گا</h2> <h2>مجھے کام رونے سے اکثر ہے ناصح</h2> <h2>تو کب تک مرے منہ کو دھوتا رہے گا</h2> <h2>بس اے گریہ آنکھیں تری کیا نہیں ہیں</h2> <h2>کہاں تک جہاں کو ڈبوتا رہے گا</h2> <h2>مرے دل نے وہ نالہ پیدا کیا ہے</h2> <h2>جرس کے بھی جو ہوش کھوتا رہے گا</h2> <h2>تو یوں گالیاں غیر کو شوق سے دے</h2> <h2>ہمیں کچھ کہے گا تو ہوتا رہے گا</h2> <h2>بس اے میرؔ مژگاں سے پونچھ آنسوؤں کو</h2> <h2>تو کب تک یہ موتی پروتا رہے گا</h2> <h3>مرزا غالب</h3>